- Besiana Sinanaj
- May 14
- 2 min read
Ishte një nder i madh që u përzgjodha për edicionin e VII të Bienales së Artit të Londrës, e cila u zhvillua nga 16 deri më 20 korrik 2025. Mund të them me gjithë zemër se debutimi im në një ekspozitë ndërkombëtare të artit ishte i këndshëm dhe më mësoj shumë!
Vërtet u trondita ditën e hapjes kur mbërrita në Chelsea Old Town Hall. Një radhë tepër e gjatë më ra në sy në King's Road dhe pyeta veten: për çfarë vallë po rreshtohen këta njerëz?... Qesha kur mora vesh se ishte për ekspozitën! Më kujtoi rradhën tek muzeu i Vatikanit - e njëjta pritje pa durim për të parë thesaret brënda.
Brënda sallës, veprat e artit ishin organizuar bukur dhe shumëllojshmëria e temave, materialeve dhe kompozimeve bënte që të kishte diçka për çdo shije. Kuratorët bënë një punë të shkëlqyer. Jam e sigurt se bisedat entuziaste mes artistëve dhe të ftuarve të tyre ishte arsyeja që temperatura e sallës po ngrihej në qiell.
Unë paraqita ‘80 Kelvin: Journey of a Scientist’ [80 Kelvin: Udhëtimi i një shkencëtari], një pikturë me bojë vaji që eksploron kureshtinë dhe brishtësinë në botën e punës kërkimore akademike. Piktura paraqet një moment surreal që shpaloset në 80 Kelvin - temperatura që funksionon mikroskopi krio-elektron - ku një shkencëtar i veshur me trikon e tij të preferuar, mbështetet dhe reflekton. Kjo pikturë është shitur dhe ndodhet në një koleksion privat.
Gjatë natës së hapjes, pata kënaqësinë të flisja me disa artistë për punën dhe rrugëtimin e tyre në botën e artit. Kaq shumë ngjashmëri, por edhe dallime, me rrugëtimin tim artistik. Diskutimi më befasues ishte në Galerinë Gagliardi ku më pyetën se çfarë ngjashmërish shoh midis sistemeve në biologji dhe sistemeve në art. Eksplorimi i këtyre lloj pyetjeve me një gotë vere në dorë më kënaq jashtë mase. Sa gjynah që duhet të kapja trenin herët...
Shumë dashuri për të gjithë miqtë dhe familjen time që vizituan ekspozitën dhe udhëtuan larg e gjerë për të festuar me mua në një piknik në Hyde Park.
